హైదరాబాద్‌కు మ‌రో ‘క్యూట్‘ టైటిల్‌

అందాల పోటీలో హైద‌రాబాద్ మరోసారి స‌త్తా చాటింది.. అయితే ఇది అమ్మాయిల‌కు కాదులేండి.. అందంగా ముస్తాబు అయి తెలివితేటలు ప్రదర్శించిన వీధి కుక్క‌ల కోసం నిర్వ‌హించిన పోటీ. ఇందులో హైద‌రాబాద్‌కు చెందిన రోస్కో అనే డాగ్ ‘క్యూటెస్ట్ ఇండియ‌న్ డాగ్ అలైవ్ 2016‘ టైటిల్ సొంతం చేసుకుంది. హైద‌రాబాద్‌కు చెందిన స్పంద‌నా రాజ్ అనే మ‌హిళ పెంచుతున్న కుక్క‌ను పోటీల‌కు పంపారు. అదే విజేతగా నిలిచింది. అయితే ఇదేమీ ల‌క్ష‌లు పోసి కొన్న కుక్క‌ కాదులేండి. వీధుల్లో ఉంటూ ఇబ్బందులు ప‌డుతున్న సమయంలో మానవత్వంతో స్పందించి తీసుకొచ్చిన కుక్క‌. అలాంటి వాటికే అవేర్ నెస్ పెంచడానికి ఈ పోటీలు నిర్వహించారు. ఇది కూడా అషామాషీ సంస్థ పెట్ట‌లేదు. ప్ర‌పంచ‌వ్యాప్తంగా యానిమ‌ల్స్ కోసం ప‌నిచేస్తున్న పీపుల్ ఫ‌ర్ ఎథిక‌ల్ ట్రీట్‌మెంట్ ఆఫ్ యానియ‌ల్ – పెటా సంస్థ ఆధ్వర్యంలో జరిగింది. ఈ పోటీలో వంద‌ల జంతువుల‌ను ప్ర‌ద‌ర్శించారు. వేల మంది ప్ర‌జ‌ల‌నుంచి వ‌చ్చిన ఓట్లు, జ‌డ్జిల అభిప్రాయాల‌ను క్రోఢీక‌రించి ఫ‌లితాలు విడుద‌ల చేశారు. రెండోస్థానంలో కొల్‌కొతాకు చెందిన నెక్తీ అనే కుక్క నిలిచింది. దీనికి గార్డియ‌న్ అన‌న్య క‌ర్మాక‌ర్‌. వీధుల్లో అనాధ‌లుగా ఉన్న కుక్క‌ల‌ను తీసుకొచ్చి సాధుకుంటున్న వాటికి ఇలా ప్ర‌తిఏటా పెటా క్యూటెస్ట్ డాగ్ పోటీలు పెడుతోంది. ఇది ఐదోసారి. ప్ర‌ద‌ర్శ‌న‌లో వాటి తెలివితేట‌లు, ప్ర‌వ‌ర్తన ఆధారంగా విజేత‌ల‌ను ఎంపిక చేస్తారు.

Recommended For You

Comments are closed.